Winterzauber

Was het der Winter über d Nacht au mit mym Huus und Garte gmacht!
S isch alles wien es Määrli. Verzauberet isch jeede Ascht,
Jeedwäädre dreit e schweeri lascht, es pypst es Spatzepäärli.

Verzuckered isch Struuch und Haag, klaar, silberhäll verwacht dr Daag,
es glitzere duusig Stäärnli. Still und verdröimt stoot Wald und Baum
und dröimt der schönschti Winterdraum, es chnischtered in der Fäärni.

E wyssi Decki dreit mys Huus, luegt gspässig, ganz verschlofe druus,
us däm Fluumduech, wäich und zaart, und d Fänschter - doo sy Vorhäng draa,
wie me se niene chaufe chaa, us Spitze vo schönschter Art.

Yyszäpfe dropfe styff vom Dach, früsch überfroore isch dr Bach,
zuedeckt mit glitzerige Chralle. Wie doch der Winter zaubere cha!
I stuun und stuun das Wunder aa, loo mer dä Spuk lo gfalle.
Elfried Mathys